ගුරු නෙතට හසු නොවූ පසු පෙළින් පැනයක්

“ගිම්හානයේ අසනි වැස්ස” මගේ කුළුදුල් කාව්‍ය සංග්‍රහයෙනි.

අකුරු ඉලක්‌කම් හඳුනන අය අතරේ
නොදනිමි කිමැයි යනු ශිල්පය සහ සතරේ
ඔබ නොදකිනා පිටුපස පෙළකම නිතරේ
එළියක්‌ නොදුටු මා තවමත් ඇත අඳුරේ


පිළිතුරු කියන්නට ඔසවා නැත දෑත
"පෙර" "කම්" "කතු" විබත් ඒවා බෝ ඈත
ගණන් හදන්නට හුරු නෑ මගෙ දෑත
වේවැල් පහර මතකයි දිනයක මෑත


ගණිතය නම් නොමැත මට පිහිටා ඇත්තේ
හදන ගණන් කවදාවත් හරි නැත්තේ
පොත විසි කරයි වෙත පන්තිය එළි පත්තේ
ඔහු මට තව තවත් නම්පට බැඳ ඇත්තේ


ඉදිරි පෙළේ සිසුවන් වෙත සිත පැහැද
පසුබට නොවේ අගයන්නට උන් නොමඳ
මා වෙත නිතර ගැලුවත් අවමන් මුහුද
පැනයක්‌ මෙමට ඇත ඔබ වෙත ගුරු සබඳ


ඔබ මා බොහෝ කලකට පෙර දැන ගත්තේ
පසුපෙළ සිසුන් නැඟුමට නැහැ වෙර ගත්තේ
ප්‍රගති පොතේ මට කළු තිත්මය ඇත්තේ
ඒ වරදට ඔබේ කළු තිත කොහි ඇත්තේ  

කවි පෙළ පිළිබඳ විචාරය මෙතැනින් කියවන්න.(දිවයින - 2016/06/16)